Matolaen

No nyt non vaalit tältä kertaa käyty, vaikuttaa vahvasti siltä ettei tartte toisela kiroksela lappua täyttää. Toinen ehokas hinkuaa Nathoon ja toinen ei juurikhaan ole uskottava ylipääliköksi sivari miehenä, näin mie sen aattelen. Sole mithää aikansa kutaki.

Voi mahoton ko mie en meinanu muistaakhaan kertoa että hääty ellää melko pitkhään ennen ko sai omala nimelä myrskyn aikakirhjoin. Onhan net vishiin sähöttä osa vieläki, ny on vishiin syylinen lumi jota mekki olema saahneet luuattavaksi kohta liikaaki. Nousevana päivänä aattelin taas pyöhräyttää tusinan toista rieskoja ja jälkilämmössä ruukaan paistaa kymmenkunta ruislimppua.Ny son kummaa hommaa Suomessa ko häätyy eelisenä päivänä käyä kaupassa kattomassa saapiko tuohreen leivän pääle oikeata voita ettei jää nautinot puolitiehen.         

Hirvihommissa son ollu korton huono tuuri nyt tammikuussa ko on jääny junan alle pari emmää joila kummalaki oli tuplavasikat sisälä ja toisela oli vielä keyhäilinenki vasikka uhrina, sitte vielä ennen ritavaaraa jä menheen keyhään urosvasikka auton alle ja eiko henki pois, semmosta se hirvitten elämä on aluheila mihin ihmisekki on kulkunsa suunahneet.

Tältä se näyttää hirven alku, noin kolmen kuukauden ikäisenä. Emä jäi junan alle ja samalla menehtyi kaksi hirvenalkua.

Pienestä se isonkin eläimen matka alkaa salojen kuninkaaksi.

Tämä se tuntui ja maistui paljon paremmalta, juuresta tehdyt ruislimput uunissa kypsymässä,,,,nam,nam,nam.....

Tammikuuta elethään ja uusia päätöksiä jahtirintamalla on tehty. Aattelin lähteä uusile jahtimaile pikkuporukhaan, kymmenkunta meitä on porukassa ja kotoma minkälaista tuntemusta mettäsielu löytää uusista ympyröistä. Ilman muutosta solis minun hirvenpyynti loppunu kokolaila varmasti. Jaa`a saapi nähä löytyykö minkälaisia elämyksiä ens syksynä.

Sole mithään, eilen oli joululeivän tekopäivä. Värkkäsin ajankuluksi luomujauhoista rieskat ja vanhasheen malhiin juuresta ruislimppua, häätyy sanoa että tuli rohki hyyää. On net ihmiset olheet ennen käteviä ko net on osahneet tehä ruisleipää ilman hiivaa, non vain käyttänheet entisen taikinan ripheet juuren tekhoon ja luonto on hoitanu loput yön aokana. Juurenteossa son sama hunteeraamisen paikka ko kananmunassa; kumpi oli ennen muna vai sen tekijä. Omatekonen leivin uuni pellaa ko junien aikataulujen laatijat; tavotheena täyellisyys ja tullee mitä tullee. Hyyää joulua kaikille ja makuhermoile nautintoja ainaki nuutin päihvään asti.