Met olima Matolaen Kiiran kans mettälä ja jo aamula päätethin että jos jotaki tartuu haukhuun niin sitä jahathaan koat piipusa lophuun asti. Niin siinä sitte käviki että vähän "hirvivisule" tarttu naaras haukhun. Mikäs siinä ko olin Kiirale luanu hoitaa homman kotia jos "TAPIO" suopi, pääsimä suolisthaan ennen puoltapäivää. Ollikaisheen siihen länsi rintheeshen pohjospäähän.

Väärtit tuli aphuun ko piti raahata elikko nylkyvaihaan Kömehriin, hyvin se huilas muovilevyn päälä, luntaki juuri passelisti ettemä tarvihneet monestikhaan puhaltaa emmekä tilata Aslakkia.

Räknäsimä että meilä oli naruissa kiini neljä käsiparia mutta miesvoimaksi laskethiin alle kolme ko mie huonosölkänen ja Olli sairati kylkiluitansa eikä se Vuoskun Ristokhaan pitäny itteänsä täytenä, yli viiskymppinen ko on, niin täyen miesvoiman vetäjäksi jäi vain Kumpulan Esa.

Eipä siinä mithää, saima näinki "voimaköyhälä" porukala elikon vajale roikhuun oothaan jakoa taikka purkitukseen viemistä. 

Hyyää joulua vain kaikile mettämiehile ja naisile, otama ossaa traakisheen taphaukseen joka sattu Ruottinmaala hirvijahissa.