Aamujen aamuja vain kaikille, lueskelin tuossaa pakkasaamuna (Lempeässä -25.3) uuistunutta Lapin Kansaa. Ensimäisenä ilmestymisviikkona on pitäny opetella hakheen tutut jutut uuistunheesta avisista, pikku hiljaa net alkaa löythyyn.

Tänä aamuna silmäilessäni lehteä havanoin yhen jutun jota oleen ootellu jo pitkhään. Särkelän Jorma oli kirjotellu saalistilastoja menheen syksyn hirvitten tuhoamis rosessista, häätyy sanoa että mie allekirjotan myös jokhaisen Jorman kirjottaman sanan. "Mettäherrat" Aulan ja kumppaneitten johola on pääsheet tavoitheeshensa, hirvet on tapettu lähes yhetömhiin. Mettäömiesten itsehillintä ja vastuunkanto on huomattu olemattomaksi ja käyttämättömäksi luonnonvaraksi. Seuraukset met kannama itte ensi- ja tulevina syksyinä.

Meile mettämiehile on annettu käythöön vaivihkaa "uusi" tuhoamisase hirvikantaa kohtaan. Met saama tappaa pari vasikkaa yhen aikusen lisensillä, äkkiä aateltuna se tuntuu jopa hyältä mutta ei kestä tarkempaa analysointia. Son ollu luomakunnan alusta asti ainoa oikea tottuus että syntyhneestä vasasta kasvaa aikunen joka tekkee joskus meile uuen vasan jota met saama jahata ja haukuttaa. Nyt met olema muka säästänheet hirviä ampumalla kymmeniä ylimääräsiä vasikoita emmekä ole aatelhet ollenkhaan että olema syömässä jo etukätheen tulevien vuositten saalista.

Hirven pyynthiin pittää tua takasi tiukemat säänökset jokka ylempitaho, joko riistanhoito- yhistykset tai riistanhoitopiiri määrää. Mettämiesten vastuule sitä ei kannata antaa sillä niitten vastuunkanto on taas kerran menheenä syksynä toettu olemattomaksi.

Nyt on vuosikokousten aika jotenka kannattaa olla valhveila valittaessa henkilöitä luottamustoihmiin että voisima pelastaa hirvikannasta mitä pelastettavissa on.

UGH... Taas olen puhun ja keventäny mieltäni......